काठमाडौं,९ असोज। काठमाडौं उपत्यकाका नदी तथा खोलामा बाढीको जलसतह बढेपछि ट्राफिक प्रहरीले करिडोर भएर यात्रा नगर्न सर्वसाधारणलाई आग्रह गरेको छ।

लगातारको वर्षाका कारण मनोहरा खोला, वागमती,विष्णुमती नदी र चोभार गल्छीमा पानीको सतह बढ्दै गएको हो। पानी खोलाको किनारा नाघ्ने अवस्थामा पुगेको छ । वर्षा अझै नरोकिएकाले पानीको बहाव थप बढ्दै जाने देखिएको छ।

बाढीको पानी बढेसँगै च्यासलस्थित नेकपा एमालेको केन्द्रीय कार्यालयसमेत डुबानको जोखिममा परेको छ । गत वर्ष पनि मनोहरा खोलामा आएको बाढी पार्टी केन्द्रीय कार्यालय परिसरमा पस्दा कार्यालय डुबानमा परेको थियो

वर्षा निरन्तर भइरहेकाले च्यासल क्षेत्रका बासिन्दा तथा आसपासका संरचनामा समेत बाढीको जोखिम बढेको छ । सुरक्षा निकायले तटीय क्षेत्रमा माइकिङ गरेर सचेत रहन आग्रह गरेको छ ।
खोलाको पानी बढेर मनोहरा पुलसम्म पुगेपछि सुरक्षाकर्मीले उक्त क्षेत्रमा आवतजावतमा रोक लगाएका छन्।सम्भावित दुर्घटनालाई मध्यनजर गर्दै उद्धार टोलीसमेत परिचालन गरिएको छ ।

यसैगरी,वाग्मतीको बाढीले बल्खुस्थित तरकारी बजार जोखिममा परेको हो । बजारको सतहसम्म बाढी आएको छ । वाग्मतीको किनारमा रहेको बजार वर्षायाममा बाढीको जोखिम हुने गर्छ ।