दावा जाङ्बु शेर्पा,काठमाडौं,१६ साउन। बौद्ध परम्परामा दोस्रो बुद्धको रुपमा चिनिने गुरु पद्मसम्भव (गुरु रिन्पोछे)को जन्म दिवस ‘छेच्यु’ तथा बौद्ध धर्मका धर्मपाल मानिने महाकालको जात्रा यस वर्ष पहिलो पटक विविध धार्मिक र सांस्कृतिक कार्यक्रमका साथ मनाइने भएको छ ।

बौद्धनाथ क्षेत्र विकास समितिले शुक्रबार पत्रकार सम्मेलन गर्दै गुरु रिन्पोछेको जन्म दिवसको अवसरमा साउन १९ गते बिहान ९ बजेबाट बौद्ध महाचैत्य आसपासका विभिन्न स्थलहरू महाकाल, तीनचुली र घ्योइलिसाङ पोखरी(गुरु पार्क)मा विशेष पूजाअर्चना गरिने जनाएको छ ।

सोही दिन दिउँसो ३ बजे तीनचुलीबाट गुरु रिन्पोछेको प्रतिमासहित निकालिने,शोभायात्राले बौद्ध महाचैत्यको परिक्रमा गरेपछि गुरु रिन्पोछेको आठ लीला झल्काउने ‘गुरु छेड्गे छ्याम’ धार्मिक नृत्य प्रस्तुत गरिने छ । यसैबीच, महाकाल जात्राको परम्परागत थालनी गर्दै साउन २७ गते दुइ हाते महाकालको जात्रा पनि गरिने समितिले जनाएको छ ।

महाकालको पूजा लामा,बज्राचार्य र ब्राह्मण गुरुहरुद्वारा गरिनेछ । महाकालको प्रतिमालाई खटमा राखी रामहिटी,तीनचुली,बौद्ध, टुसाल,चुच्चेपाटी हुँदै पुनः महाकाल स्थानमा फर्काइनेछ ।

११ बजेदेखि सुरु हुने जात्रामा शार्दूल जंग गुल्म (गुरुजु पल्टन)ले हर्ष बढाइ कार्यक्रम प्रस्तुत गर्ने कार्यक्रममा जानकारी दिइएको थियो । ।