सम्पर्कविहिन २२ प्रहरीलाई प्रधान कार्यालयले सोध्यो सातदिने स्पष्टीकरण

काठमाडौं।नेपाल प्रहरीको प्रधान कार्यालयले कार्यालयको सम्पर्कमा नरहेका २२ जना प्रहरीलाई ७ दिनभित्र गैर हाजिर हुनाको कारण खुलाई स्पष्टीकरण दिन सूचना जारी गरेको छ।

प्रहरी हेडक्वार्टरले बुधबार गैरहाजिर प्रहरीहरुको नामावलीसहित एक सूचना सार्वजनिक गर्दै ७ दिनभित्र कार्यालयमा हाजिर हुन आउन निर्देशन दिएको केन्द्रीय प्रहरी प्रवक्ता तथा प्रहरी नायब महानिरीक्षक कुवेर कडायतले जानकारी दिए। उनले भने, ‘लामो समयदेखि आफूखुसी कार्यालयमा गैरहाजिर भएका र खोजतलास गर्दा पनि नभेटिएकाले आज (बुधबार) सूचना प्रकाशित गरी गैरहाजिर हुनाका कारण खुलाई स्पष्टीकरण पेस गर्न १ हप्ताको म्याद दिइ सम्पर्कमा आउन भनेका छौँ।’

प्रहरी प्रधान कार्यालयद्वारा बुधबार प्रकाशित सूचनाअनुसार गैरहाजिर भएका प्रहरी कर्मचारीहरुमा प्रहरी सहायक हबल्दारहरु अमित श्रेष्ठ, समीर दाहाल, जनम राई र कमल श्रेष्ठ रहेका छन्।

साथै, प्रहरी जवानहरुमा निवास चौधरी, पूर्णबहादुर वली, हेमन्त कुमाल, प्रेम कुँवर, उमेश लामा, अमर डाँगी, दीपक राई, सुस्मत खड्का, केवोङलिङ आङदेम्बे, जीबहादुर पुन, राजकुमार महत, अनिल परियार, प्रकाश अधिकारी, आशामाया तामाङ, किशोर थारू, मोहनसिंह विक, सुरेन्द्रबहादुर शाही र सन्तोष सुनार छन्।