काठमाडौं ।शनिबार सुरु नेकपा एकीकृत समाजवादीको केन्द्रीय कमिटी बैठकमा अध्यक्ष माधवकुमार नेपालको प्रतिवेदनमाथि छलफल गर्न १० वटा समूह बनाइएको छ ।

केन्द्रीय कमिटी सदस्यहरुलाई १० वटा समूहमा विभाजन गरी समूह छलफल गरिने एक नेताले जानकारी दिए ।समूहमा आइतबार विहानसम्म छलफल हुने र समूहको निश्कर्ष पेश गर्ने कार्यतालिका रहेको छ । शनिबार सुरु भएको बैठकमा अध्यक्ष नेपालले राजनीतिक प्रतिवेदन पेश गरेका थिए ।

बैठकमा प्रस्तुत प्रतिबेदनमा अध्यक्ष नेपालले संसद्‌भित्र रहेका ११ दलको चरित्र चित्रण गरेका छन्। जसमा उनले नेपाली कांग्रेसलाई दलाल पूँजीपतिको पार्टीका रूपमा व्याख्या गरेका छन्। प्रतिवेदनमा भनिएको छ, ‘अहिले प्रतिनिधि सभाको सबैभन्दा ठूलो दलका रूपमा रहेको नेपाली कांग्रेस पूँजीपति वर्ग चरित्रको पार्टी हो। नवउदारवादको पक्षपोषण गर्ने यस पार्टीले दलाल पूँजीपति वर्गको समेत हित प्रतिनिधित्व गर्दछ। तथापि, यो पार्टी संविधान र लोकतन्त्रको रक्षाप्रति प्रतिबद्ध रहेको पाइन्छ।’

त्यस्तै, नेकपा (एमाले)लाई दक्षिणपन्थी पार्टी भनेका छन्। ‘प्रतिनिधि सभाको दोस्रो ठूलो दलका रूपमा रहेको नेकपा (एमाले) दक्षिणपन्थी अवसरवादी चरित्रको कम्युनिष्ट पार्टी हो। यसको वर्ग अडान स्पष्ट छैन। दलाल पूँजीपति वर्गसँगको लसपसले गर्दा यसको नेतृत्व तीव्र गतिमा दक्षिणपन्थी हुँदै गएको छ,’ प्रतिवेदनमा उल्लेख छ।

नेकपा (माओवादी केन्द्र)लाई ढुलमुले पार्टीका रूपमा व्याख्या गरेका छन्। नेपालले भनेका छन्, ‘प्रतिनिधि सभाको तेस्रो ठूलो दलका रूपमा रहेको नेकपा (माओवादी केन्द्र) ढुलमुले चरित्रको कम्युनिष्ट पार्टी हो। यसको पनि वर्ग अडान स्पष्ट छैन। सशस्त्र द्वन्द्वबाट शान्ति प्रक्रियामा आएको यो पार्टी शान्ति प्रक्रिया लम्बिंदै गएपछि सत्ताको वरिपरि केन्द्रित हुँदै गएको छ। यो पार्टी संविधान र लोकतन्त्रप्रति प्रतिबद्ध नै छ, तर सत्तास्वार्थका निम्ति कुनै पनि वेला जुनसुकै कदम चाल्न सक्ने अस्थिर र ढुलमुले प्रवृत्ति यसमा देखिएको छ।’