काठमाडौं । १० बजेदेखि ४ बजेसम्म सञ्चालन हुँदै आएका देशभरका विद्यालयहरु आगामी शैक्षिकसत्रदेखि विहान ९ बजेदेखि ३ बजेसम्म सञ्चालन हुने भएका छन् । मुख्य सहरहरुमा बढ्दो ट्राफिक जामलाई कम गर्नका लागि भन्दै सरकारले विद्यालय समय १ घण्टा अघि सारेको हो । प्रधानमन्त्री तथा मन्त्रिपरिषदको कार्यालयले नयाँ शैक्षिक सत्रदेखि बिहान ९ बजेदेखि ३ बजेसम्म विद्यालय सञ्चालन गर्ने÷गराउने निर्णय गर्दै शिक्षा मन्त्रालय र मन्त्रालय मातहतका निकायलाई सोहीअनुरुप लागु गराउन निर्देशन दिइसकेको बताइएको छ । सरकारको निर्देशनसँगै आइतबार शिक्षा मन्त्रालयले विद्यालय सञ्चालनको नयाँ समय कार्यान्वयबारे सरोकारवालासँग छलफल गरेको थियो ।
छलफलमा प्याब्सन, एनप्याब्सन, हिसान, ट्राफिक प्रहरीका अधिकारी, अभिभावकका प्रतिनिधि तथा काठमाडौं, ललितपुर, भक्तपुर र मध्यपुर ठिमी नगरपालिकाका प्रतिनिधिहरु सहभागी थिए ।