काठमाडौँ । भ्रष्टाचार र संगठित अपराधविरुद्धको अनुसन्धान औपचारिकतामा सिमित भएको भन्दै बृहत नागरिक आन्दोलनले काठमाडौमा प्रदर्शन गरेको छ ।’एउटै मान्छे,दुई थरी कानुन किन?’ ‘घुम्ने मेचमाथि सुनको मान्छे’ ‘तस्करीले देश बन्दैन’भन्ने खालका प्लेकार्ड सहित आन्दोलनले शनिबार भद्रकालीमा विरोध प्रदर्शन गरेको हो।

प्रदर्शनमा ललिता निवास,नक्कली शरणार्थी र सुन तस्करी प्रकरणमा अनुसन्धान प्रक्रिया फितलो भएको भन्दै नागरिक अगुवाहरूले खबरदारी समेत गरेका थिए। यी प्रकरणमा गरिएको चयनात्मक अनुसन्धान र अभियोजनले सरकार नै भ्रष्टाचार र संगठित अपराधलाई प्रश्रय दिन उद्यत रहेको पुष्टि हुने आन्दोलनद्वारा जारी विज्ञप्तिमा उल्लेख छ।

ललिता निवास प्रकरणमा मुछिएका पूर्व प्रधानमन्त्रीद्वय माधवकुमार नेपाल र बाबुराम भट्टराईलाई छानबिनको दायरामा ल्याउन, सर्वोच्च अदालतले दिएको आदेशको यान्त्रिक पालना गरेको देखाउन बयान लिने औपचारिकता पूरा गरेर उनीहरूलाई अभियोजन नगरी साक्षीका रूपमा उन्मुक्ति दिएको विज्ञप्तिमा दाबी गरिएको छ।