सोलुखुम्बु। नेपाल शिक्षक महासंघको जारी आन्दोलनप्रति नेकपा एमाले सोलुखुम्बुले ऐक्यवद्धता जाहेर गरेको छ।

नेपाल सरकार मन्त्रिपरिषदबाट निर्णय भई स्वीकृतिका लागि प्रतिनिधि सभामा पेश हुन लागेको संघीय शिक्षा ऐन-२०८० विरुद्ध महासंघले चरणबद्द आन्दोलन सुरु गरेको तेस्रो दिन नेकपा एमाले जिल्ला कमिटी सोलुखुम्बुका अध्यक्ष डुफकुमार बास्तोलाले एक बिज्ञप्ति जारी गर्दै मंगलबार ऐक्यबद्धता जाहेर गरेका हुन्।

२०७५ सालमा शिक्षक महासंघ र शिक्षा विज्ञान तथा प्रविधि मन्त्रालय वीच भएको ३० र ११ बुँदे सहमति प्रतावित ऐनको मस्यौदामा नसमेटिनु दुःखको विषय भएको उल्लेख गर्दै बिज्ञप्तिमा संघीयताको कार्यान्वयन पछि तीन तहको सरकार र यसको अधिकार क्षेत्रलाई अझ प्रष्ट पार्दै अधिकारको कार्यान्वयनको क्रममा देखापरेका कैयन समस्याहरुको सहजीकरण एबम् शिक्षक/ शिक्षकवीचको बिभेद ( राहत, स्वयसेवक), अन्त विद्यालय कर्मचारी र बालकक्षा शिक्षकको न्यायोचित मागलाई समेत सम्वोधन हुने गरी संघीय शिक्षा ऐन आउनुपर्ने आवश्यकता औंल्याइएको छ।

‘शिक्षा सम्बन्धी सबै पेशागत संघ संगठनसँग गरिएको सहमति, हालसम्मको अनुभब तथा सिकाईलाई दस्तावेजीकरण गर्ने, आत्मनिर्भर र रोजगारमूलक जनशक्ति उत्पादन गर्ने वातावरण निर्माण गर्ने खालको संघीय शिक्षा ऐन ल्याउन आवश्यक छ’,- एमाले अध्यक्ष बास्तोलाद्वारा जारी बिज्ञप्तिमा भनिएको छ।

प्रस्तावित संघीय शिक्षा ऐन विरुद्ध नेपाल शिक्षक महासंघ साउन २८ गतेदेखि चरणबद्द आन्दोलन गरिरहेको छ।