सोलुखुम्बु ।सगरमाथा सफल आरोहणको ७० औं बर्षगाँठका अवसरमा खुम्बु पासाङल्हामु गाउँपालिकाले यहि मे २६ देखि २९ तारिकसम्म विभिन्न कार्यक्रमको आयोजना गरेर’प्लाटिनम जुब्ली’मनाउने भएको छ ।

सो अवसरमा गाउँपालिकाले जेठ १२ तदनुसार मे २६ मा तेन्जिङ हिलारी बिमानस्थल लुक्लामा तेन्जिङ हिलारी पार्कको उद्घाटन गर्ने कार्यक्रम तय गरेको गाउँपालिका अध्यक्ष मिङ्माछिरी शेर्पाले जानकारी दिए।अध्यक्ष शेर्पाका अनुसार जेठ १३ र १४ गते तदनुसार मे २७ र २८ मा खुम्जुङ माध्यमिक विद्यालयमा विद्यालयस्तरीय अतिरिक्त क्रियाकलापको कार्यक्रम राखिएको छ ।

यस्तै, जेठ १५ तदनुसार मे २९ मा खुम्जुङ माध्यमिक विद्यालयमा “सर एडमण्ड हिलारी भिजिटर्स सेन्टर” र सगरमाथा राष्ट्रिय निकुञ्ज नाम्चेमा तेन्जिङ नोर्गे शेर्पा संग्रहालय केन्द्र” को उद्घाटन गरिने कार्यक्रम गरिनुका साथै सगरमाथाको सफल आरोहण भएको दिन अर्थात् मे २९ मा नै नाम्चे बजारमा सर एडमण्ड हिलारी र तेन्जिङ नोर्गे शेर्पाको परिवारलाई सम्मान पत्र वितरण र एभ्रेष्ट म्यूजिकल नाइटका साथमा प्लाटिनम जुब्ली कार्यक्रम समापन गरिने अध्यक्ष शेर्पाले जानकारी दिए।

सन् १९५३ मे २९ मा नेपालका तेन्जिङ नोर्गे शेर्पा र न्यूजिल्याण्डका सर एडमण्ड हिलारीले सगरमाथाको पहिलो पटक सफल आरोहण गरेका थिए।तेन्जिङ नोर्गे शेर्पा र एडमण्ड हिलारीले १९५३ मे २९ मा सगरमाथाको आरोहण गरे पश्चात् ८ हजार भन्दा बढीले सगरमाथाको आरोहण गरि सकेका छन् ।