काठमाडौँ।नेपाली कांग्रेसका सभापति शेरबहादुर देउवाबिरुद्ध पार्टी केन्द्रीय कार्यालय सानेपामा प्रदर्शन भएको छ।

केन्द्रीय कार्यसमिति बैठकअघि सभापति तथा प्रधानमन्त्री शेरबहादुर देउवाविरुद्व विभिन्न नाराहरु लेखिएका प्ले-कार्डसहित नेता शेखर कोइराला पक्षका तरुण र विद्यार्थीहरुले प्रदर्शन गरेका हुन् ।

प्रदर्शनकारीले प्रधानमन्त्री देउवाको गाडीलाई कांग्रेस कार्यालय परिसर प्रवेशमा अवरोध पुर्‍याएपछि प्रहरीसँग धकेलाधकेल भएको छ ।

तरुण र विद्यार्थीहरुले भ्रातृ संस्थामा एकलौटी नियुक्ति गरेको तथा अध्यक्षमात्रै नियुक्त गरेर अपूरो बनाएको, महाधिवेशन सकिएको छ महिना बितिसक्दा पनि पार्टीका विभागहरु गठन नगरेको तथा विधानबमोजिमका अन्य कामहरु पूरा नगरेको भन्दै विरोध गरेका छन् ।

स्थानीय निर्वाचनको परिणाम र चुनावी गठबन्धनबारे छलफल गर्न भन्दै कांग्रेस केन्द्रीय कार्य समितिको बैठक आजबाट सुरु भएको हो।