एजेन्सी
इङ्लिस प्रिमियर लिग फुटबलमा चेल्सीलाई म्यानचेस्टर युनाइटेडको नराम्रो धक्का लागेको छ । सोमबार राति भएको खेलमा चेल्सी युनाइटेडसँग २–० गोलले पराजित भयो ।

चेल्सीका दुई वटा गोलले भीएआरको सहायतामा मान्यता नपाउँदा निरास बनेको थियो । चेल्सीलाई उसैको मैदानमा हार चखाउन युनाइटेडका एन्थोनी मार्सियल र ह्यारी मिगुएरले गोल गरे ।

४५औँ मिनेटमा एन्थोनी मार्सियालले आरोना विशाखाको पासमा गोल गर्दै युनाइटेडलाई अग्रता दिलाए । दोस्रो हाफमा सानदार प्रदर्शन गरेको चेल्सीले गोलको अवसर पनि बनायो । तर, ५४औं मिनेटमा कोर्ट जोउमाले गरेको गोललाई भीएआरको सहायतामा मान्यता दिईएन ।

६६ औँ मिनेटमा ह्यारी मिगुएरले गोल गर्दै युनाइटेडको अग्रता दोब्बर बनाए । उनले ब्रुनो फर्नान्डेजको पासमा गोल गरेका थिए । त्यसपछि ७७ औँ मिनेटमा चेल्सीका ओलिभर गिरुउडको गोललार्ई भीएआरकै सहायतामा अफसाइड दिएपछि चेल्सी हार खेप्न बाध्य बनेको थियो ।

हारसँगै चेल्सी चौथो स्थानमा छ । चेल्सीले २६ खेलबाट ४१ अंक बनाएको छ । ३८ अंक बनाएको युनाइटेड सातौं स्थानमा उक्लिएको छ ।

एउटै सिजनमा युनाइटेडले चेल्सीलाई गोल नखाइ दुई पटक पराजित गरेको सन् १९६४/६५ सिजन पछि पहिलो पटक हो । यता, चेल्सीले सन् १९९४/९५ पछि पहिलो पटक एक सिजनमा घरेलु मैदानमा सात खेलमा पराजित भएको छ ।