चार मुक्तक
- नम्रता उप्रेती
मुक्तक १
सुनसान मनको नवीन मेरो रहर बताई देऊ
विश्वास थुनिएको मायाको घर बताई देऊ
सुटुक्क आई मुटु चोरेर जाने मान्छे कता छ,
बुझेर आउ चरी मलाई उसको खबर बताई देऊ ।
मुक्तक-२
रुखो सम्झ या कमलो सम्झ बचन छ यस्तै मेरो
धोका दिन नहुने मायाको कथन छ यस्तै मेरो
बिर्सेर बस विगतका व्यथा सधैं भन्ने गर्दछु तर ,
के गर्ने भनेको मान्दैन आखिर मन छ यस्तै मेरो ।
मुक्तक-३
दाउरा रहेछ जिन्दगी बलेर खरानी हुनु पर्ने
आघात अनेकौँ खप्दै गलेर खरानी हुनु पर्ने
सत्य बोल्छु भन्दै विश्वासघात गर्ने मान्छेले सधैँ ,
दिन्छ पीडा असाध्य ज्यूदै जलेर खरानी हुनु पर्ने ।
मुक्तक-४
सम्बन्धमा खटपट भए जेठी मधु पिउन मिल्छ
विश्वासको पर्दा पनि उध्रिएमा सिउन मिल्छ
असम्भव लाई सम्भव पार्न सधैँ कम्मर कस्ने गर्नु ,
आँटले नै जिन्दगीमा चयन सँग जिउन मिल्छ ।
नयाँबजार १६
काठमाण्डौं