चार मुक्तक
- कलानिधि दाहाल
मुक्तक १
नेता विचार हुन् सच्चा विवेकमा हुने भए
जनताका झरी झुप्रा दिल दर्द छुने भए
तर उन्माद छर्दै छन् कुर्सी भाग लगाउँदै,
सिकारीझैँ बनी ऐले जनता यी मुने भए ।
मुक्तक २
विश्व नै मनमा राख हिँड ठम्ठम ठम्ठम
स्वाद उचाइका चाख पिन ठम्ठम ठम्ठम
घाँसका तृणझैँ साना नअल्झ दुनियाँ कतै,
टुक्रा फाल सबै दाख हिँड ठम्ठम ठम्ठम ।
मुक्तक ३
अँधेरो हुन्न संसार आफैँ उज्वलमा भए
छैनन् सङ्कटका धार आफैँ उज्वलमा भए
मनमा छ भने ध्वाँसो ब्वाँसो बन्दछ मानिस,
विराट् विश्व छ सङ्घार आफैँ उज्वलमा भए ।
मुक्तक ४
एक्लो हिँड्ने न हौँ कैल्यै रवाफ स्वार्थमा परी
अहङ्कार नहोस् बोल्ने जवाफ स्वार्थमा परी
पाइला सबका साथ रहौँ जमीनमा सधैँ,
इन्कारमा नहौँ तल्ला कवाफ स्वार्थमा परी ।
रातोपुल