काठमाडौं। राष्ट्रिय पार्टीका लागि आवश्यक थ्रेस होल्ड कटाउन प्रयासरत जनमत पार्टी नेकपा (एकीकृत समाजबादी) भन्दा अगाडि बढेको छ।

प्रतिनिधिसभा सदस्यमा १० स्थानमा जित हात पारेपनि माधव नेपाल नेतृत्वको एकीकृत समाजबादी समानुपातिकमा १ सिट जितेको सिके राउत नेतृत्वको जनमत पछाडी परेको हो। समानुपातिकतर्फको मतपरिणाम आउने क्रम अन्तिम चरणमा पुग्नै लाग्दा जनमत पार्टीले २ लाख ३५ हजार ८०१ र नेकपा एकीकृत समाजवादीले २ लाख ३५ हजार ३५९ मत पाएका छन् ।

अब चमत्कारिक ढंगले मत प्राप्त गरेनन् भने यी दुई दल राष्ट्रिय पार्टी बन्नका लागि आवश्यक थ्रेस होल्ड पार गर्न नसक्ने सम्भावना बढेको छ।राष्ट्रिय पार्टी बन्न समानुपातिक तर्फ खसेको कुल सदर मतको ३ प्रतिशत पुर्‍याउनुपर्ने ब्यबस्था छ।अहिलेसम्म यी दुई पार्टीले २ दशमलव ६ प्रतिशत हाराहारी मात्रै मत पाएका छन।

आइतबार दिउँसाे ३ बजेसम्म ८७ लाख १९ हजार ९९ मतगणना भएको छ। पछिल्लो परिणामअनुसार नेकपा एमालेले २३ लाख ९१ हजार ७७८ मत प्राप्त गरेको छ। यस्तै, नेपाली कांग्रेसले २२ लाख ८३ हजार ६ सय ९० मत पाएको छ। माओवादी केन्द्रले ९ लाख ९९ हजार ८ सय ९० मत पाउँदा राष्ट्रिय स्वतन्त्र पार्टीले ९ लाख ५८ हजार ७० सय ३ मत पाएको छ।

यसैगरी समानुपातिकतर्फ राप्रपाले ५ लाख ९ हजार ४४२ मत पाएको छ। जनता समाजवादी पार्टी जसपाले ३ लाख ३३० मत पाएको छ। नागरिक उन्मुक्ति पार्टीले २ लाख १ हजार ५०८मत पाएको छ। लोसपाले एक लाख २२ हजार ६३६ मत पाएको छ।​

यसैगरी नेमकिपाले ७० हजार ३५९ मत पाउँदा हाम्रो नेपाली पार्टीले देशभरबाट ४९ हजार ९०मत पाएको छ। जनमोर्चाको ४३ हजार ३९७ मत रहेको निर्वाचन आयोगको तथ्यांक छ।