काठमाडौं ।प्रमुख बिपक्षी दल नेकपा एमालेका अध्यक्ष केपी शर्मा ओली बालुवाटारबाट फर्किएका छन्।

मंगलबार साँझ एमाले नेताहरू ईश्वर पोखरेल, विष्णु पौडेल र विष्णु रिमालसहित बालुवाटारस्थित प्रधानमन्त्रीको सरकारी निबासमा भेटबार्ताका लागि पुगेका पूर्बप्रधानमन्त्री ओलीले एमसीसी अनुमोदनका लागि प्रधानमन्त्री शेरबहादुर देउवाले गरेको आग्रह अस्वीकार गरेका हुन् ।

भेटमा देउवाले आफूलाई सत्तारूढ गठबन्धनभित्रबाटै असहयोग भएको बताउँदै एसमीसी पारितका लागि सहयोग गर्न ओलीलाई आग्रह गरेका थिए ।

जवाफमा ओलीले आफूहरूका माग पूरा नभएसम्म संसदीय प्रक्रियामा प्रवेश गर्न नसकिने बताएका थिए । उनले आफूहरूले ६ महिनादेखि सदनमा आवाज उठाएपनि सरकारले बेवास्ता गरेको बताएका थिए ।

एमालेले सूर्य चिह्नबाट निर्वाचित माधव नेपालसहित १४ जना सांसदलाई गरिएको कारबाहीको सूचना सभामुखले टाँस गर्नुपर्ने माग राख्दै आएको छ । वा सभामुखले राजीनामा दिनुपर्ने उसको माग छ ।

लामो रस्साकस्सी र सत्ता साझेदारकै विरोधका बाबजुद सरकारले फागुन ८ गते एमसीसी संसद्मा टेबल गरेको छ । तर, सत्ता साझेदार दलहरू माओवादी केन्द्र र एकीकृत समाजवादीले एसमीसी अनुमोदनमा सहयोग नगर्ने निर्णय नै गरिसकेका छन्।