काठमाडौं। प्रधानन्यायाधीश चोलेन्द्र शम्शेर जबराले राजनीमा दिनुपर्ने एक सुत्रीय बारको आन्दोलनप्रति ऐक्यबद्धता जनाउदै इजलास बहिष्कार गरेका केहि न्यायाधीशहरु काममा फर्किएका छन् ।

तीन सातापछि सर्वोच्च अदालतमा बन्दीप्रत्यक्षीकरण बाहेकका मुद्दामा पनि सुनुवाइ हुन थालेसंगै बार आन्दोलनको प्रायोजित आन्दोलनसमेत कमजोर हुने देखिएको छ।मंगलबार न्यायाधीश तेजबहादुर केसीको इजलासमा २८, प्रकाशकुमार ढुंगाना र डा। कुमार चुडालको संयुक्त इजलासमा एउटा र बमकुमार श्रेष्ठ र डा। मनोजकुमार शर्माको इजलासमा चारवटा मुद्दाको सुनुवाइ भएको छ ।

न्यायाधीशद्वय मीरा खड्का र विश्वम्भरप्रसाद श्रेष्ठको संयुक्त इजलास बसे पनि निवेदकको कानुन व्यवसायीबाट स्थगित भएको सर्वोच्च प्रशासनले जनाएको छ ।

प्रधानन्यायाधीश चोलेन्द्र शमशेर जबराले आठ संयुक्त र दुईवटा एकल इजलास तोकेका थिए । जसमध्ये आज ६ वटा इजलास बस्न सकेन । ८ कात्तिक यता बन्दीप्रत्यक्षीकरणका मुद्दामा मात्रै सर्वोच्चमा सुनुवाइ हुँदै आएको थियो । अन्य मुद्दाहरूको पेसी तोकिए पनि इजलासमा सुनुवाइ हुने गरेको थिएन ।

अवज्ञामा उत्रिएका १५ जनामध्ये पाँच जना न्यायाधीश भने इजलासमा फर्केका छन् । यससँगै न्यायाधीशहरू इजलास फर्किने देखिएको छ ।