माघ मसान्तभित्र एमालेको जिल्ला तथा पालिका कमिटीको अधिबेशन



काठमाडौं।नेकपा एमालेले पार्टीका जिल्ला तथा पालिका तहका अधिवेशन आगामी सम्पन्न गर्न सम्बन्धित कमिटीलाई निर्देशन दिएको छ।

एमालेको केन्द्रीय संगठन विभागको गत असोज ३० गते बसेको बैठकले प्रदेश कमिटीका अधिवेशन निर्धारित समयमा सम्पन्न भइसकेका हुँदा जिल्ला, स्थानीय तह र वडा तहका कमिटीका अधिवेशन सम्बन्धमा निर्णय लिएको हो। बैठकले फागुन र चैतमा पार्टी सदस्यता नवीकरणसँगै वडा र टोल कमिटीका अधिवेशन सम्पन्न गर्ने निर्णय गरेको विभाग सचिव माधव ढुङ्गेलद्वारा जारी विज्ञप्तिमा जनाइएको छ।

पार्टीका स्थायी कमिटी सदस्य तथा सङ्गठन विभाग प्रमुख काशीनाथ अधिकारीको अध्यक्षतामा बसेको बैठकले पार्टी सदस्यता प्रमाणीकरण प्रतिवेदन अनुमोदन गरेको छ। सोअनुसार भारत प्रवास र अन्तर्राष्ट्रिय कमिटी मातहतका सदस्यबाहेक पार्टीका साढे ५ लाख सदस्यहरूको सदस्यता प्रमाणीकरण भएको छ।

विभागले पार्टीका वरिष्ठ उपाध्यक्ष ईश्वर पोखरेल, उपाध्यक्ष विष्णुप्रसाद पौडेल, महासचिव शंकर पोखरेल, सल्लाहकार परिषद्का अध्यक्ष अमृतकुमार बोहरा, विभागका पूर्व प्रमुखसमेतको उपस्थितिमा भएको कार्यक्रममा प्राप्त मार्गदर्शनका आधारमा ७ बुँदे अन्तरपार्टी निर्देशन दिएको जनाएको छ।

प्रतिक्रिया दिनुहोस्