काठमाडौं– नेपाली कांग्रेसको भोलि (शुक्रबार) बस्ने केन्द्रीय समितिको बैठकमा केन्द्रय कार्यसम्पादन समिति गठनका सम्बन्धमा छलफल हुने भएको छ।

सभापति शेरबहादुर देउवाले शुक्रबार दिउँसो ३ बजे बस्ने गरी केन्द्रीय समितिको बैठक बोलाएका छन्।

नेपाली कांग्रेसका मुख्य सचिव कृष्णप्रसाद पौडेलका अनुसार बैठक भर्चुअल माध्यमबाट बस्ने छ।

पछिल्लो समय पार्टीका शीर्ष नेताहरुले नै सभापति देउवालाई केन्द्रीय कार्यसम्पादन समिति गठनका लागि दबाब दिन थालेपछि भोलिको बैठकलाई सोही विषयलाई अजेण्डा बनाइएको हो।

बिहीबार मात्रै उपसभापति पूर्णबहादुर खड्का तथा महामन्त्रीद्वय गगन थापा र विश्वप्रकाश शर्माले सभापति देउवालाई भेटेर सो समिति गठन गर्न सुझाव दिएका थिए।