काठमाडौं ७ असार । आइतबार थप ४ सय २१ जनामा कोरोनाको संक्रमण भेटिएको स्वास्थ्य मन्त्रालयले जनाएको छ । स्वास्थ्य तथा जनसंख्या मन्त्रालयले कोरोना अपडेटबारे नियमित प्रेस ब्रिफिङमा यस्तो जानकारी दिएको हो। यससँगै कुल संक्रमितको संख्या ९ हजार २६ पुगेको छ।
स्वास्थ्य तथा जनसंख्या मन्त्रालयका अनुसार कुल संक्रमित ९ हजार २६ मध्ये ८ सय २० महिला र ८ हजार २ सय ६ जना पुरुष रहेका छन्। मन्त्रालयका प्रवक्ता डा। जागेश्वर गौतमले गुल्मीमा एकजनाको कोरोनाबाट मृत्यु भएको बताए। असार ५ गते मृत्यु भएका गुल्मी छत्रकोट ५ का ६९ वर्षका पुरुषको मृत्यु भएको हो।
लकडाउनकै समयमा उपचारका लागि भारत गएका ती पुरुष प्यारालाइसिसका विरामी थिए। असार ५ गते नमुना संकलन गरी प्रदेश प्रयोगशालामा भैरहवामा भएको परीक्षणमा कोरोना पुष्टि भएको हो। आइतबार देशका विभिन्न २२ वटा प्रयोगशालाबाट ६ हजार ८ जनासँगै आइतबारसम्म पीसीआर विधिबाट १ लाख ७५ हजार १ सय ७३ जनाको कोरोना परीक्षण भएको छ।
यस्तै आरडिटी विधिबाट २ लाख ६२ हजार १ सय ७४ जनाको कोरोना परीक्षण भएको छ। अहिले देशभरीका क्वारेन्टाइनमा ९४ हजार ९ सय २८ जना रहेका छन्। देशका विभिन्न अस्पतालमा ७ हजार २ सय ३१ जना उपचाररत रहेका छन्। कोरोना निको भएर घर फर्किनेहरूको संख्या १ हजार ७ सय ७२ पुगेको छ।