काठमाडौ। तत्कालीन राष्ट्रिय पुञ्चायतकी सदस्य नानीमैयां दाहालको निधन भएको छ। दाहालको ९२ बर्षको उमेरमा सोमबार निधन भएकाे हो। निमोनियाले पीडित दाहालको हिजो उपचारकाक्रममा चाबहिलको दीर्घायु अस्पतालमा निधन भएको हो ।

कथित प्रजातन्त्रबादीहरुले मिथकको रूपमा प्रयोग गर्ने गरेपनि ‘जनपक्षीय पञ्च’को इमेज बनाएकी दाहाल पञ्चायतकालकी सुधारवादी र सुशासन पक्षधर चर्चित व्यक्ति थिइन। उनी तल्लाे वर्गका नागरिकहरूकाे आवाज बन्दै आएकी थिइन ।

पञ्चायती व्यवस्थाप्रति वितृष्णा जागेको बेला पनि जनताले उनै नानीमैयालाई जिताएका थिए । पछिसम्म पनि उनी जनताका अधिकारकै लागि मालपाेत,भूमि सुधार,नापी कार्यालय,जिल्ला विकास समिति,जिल्ला प्रशासन कार्यालय,नगरपालिकाहरूमा गएर जनताका काममा खटिरहेको देखिन्थ्यो ।

२०२९ सालमा काठमाडौंको जोरपाटी गाउँ पञ्चायतकि उपप्रधानपञ्च र पछि ०३८ काे जनपक्षीय रापंसमा निर्वाचित भएपछि उनले तात्कालिक प्रधानमन्त्री सुर्यबहादुर थापा,लाेकेन्द्र बहादुर चन्दलाई जनताका र सुशासनका पक्षमा काम गर्न आग्रह गर्ने गरेकी थिइन।२०३८ सालका रापंस चुनावमा जितेपछि उनको चर्चा तीब्र भएको थियो ।

पञ्चायतकालमा पनि जनताका अधिकारप्रति लड्ने स्वभावले उनलाई ‘जनपक्षीय पञ्च’ बनाएको थियो ।आजका भ्रष्ट,सुकिला मुकिला,ठगी धन्दा र विदेशी दलाली गर्ने नेताहरुका अगाडी नानीमैया ‘जनपक्षीय पञ्च’ नेता भएको धेरैको प्रतिक्रिया छ ।