नुवाकोट,१० फागुन । तीन दशक लामो राजनीतिक यात्रापछि नेता राजु अधिकारीले नेपाली कांग्रेस परित्याग गरी नेकपा एमाले रोज्ने घोषणा गरेका छन्। सामाजिक सञ्जालमार्फत सार्वजनिक वक्तव्य जारी गर्दै उनले पार्टीको नेतृत्वशैली र निर्णय प्रक्रियामाथि तीव्र आक्रमण गरेका छन्। “विचार र व्यवहारबीचको गहिरो खाडल अब सहन सकिँदैन,” भन्दै उनले पद र जिम्मेवारीबाट अलग भएको घोषणा गरेका हुन्।

२०४६ सालमा नेविसंघको स्कुल इकाइ अध्यक्षबाट राजनीतिक यात्रा सुरु गरेका अधिकारी २०७१ मा जिल्ला सदस्य, २०७८ मा नेपाल विद्यार्थी संघ नुवाकोटको अध्यक्ष हुँदै कांग्रेसको १४औँ महाधिवेशनपछि जिल्ला कार्यसमितिको सहसचिवसम्म पुगेका थिए। विद्यार्थी राजनीतिदेखि जिल्ला तहसम्म निरन्तर सक्रिय रहँदै संगठन निर्माणमा योगदान दिएको दाबी गर्दै उनले आफू “उच्च नैतिकता र स्पष्ट अडान”का साथ अघि बढेको उल्लेख गरेका छन्।

तर पछिल्लो समय पार्टीभित्रको अवस्थाले आफूलाई गम्भीर रूपमा निराश बनाएको उनको भनाइ छ। उनले कांग्रेस “सीमित समूहको स्वार्थ पूरा गर्ने थलो”मा रूपान्तरण भएको आरोप लगाएका छन्। निर्णय प्रक्रिया अपारदर्शी, अवसर वितरण पक्षपाती र नेतृत्व शैली एकलौटी बन्दै गएको भन्दै उनले कडा शब्दमा असहमति व्यक्त गरेका छन्। “आदर्श र सिद्धान्तको नाममा कार्यकर्ताको पसिनामाथि राजनीति गर्ने प्रवृत्ति अब स्वीकार्य छैन,” भन्ने आशयका अभिव्यक्तिहरू उनको वक्तव्यमा समेटिएका छन्।

१४औँ महाधिवेशनपछि अपेक्षित भूमिकामा उपेक्षा भएको संकेत गर्दै अधिकारीले संगठनभित्र इमानदार कार्यकर्ताको आवाज दबाउने प्रवृत्ति बढेको बताएका छन्। “मौन बस्नु भनेको गलतलाई समर्थन गर्नु हो,” भन्दै उनले आफ्नो कदमलाई ‘आत्मसम्मानको निर्णय’को रूपमा व्याख्या गरेका छन्।

अधिकारीले देशको विकास, शान्ति र समृद्धिका लागि नेकपा एमाले उपयुक्त विकल्प भएको दाबी गरेका छन्। उनको यो सार्वजनिक बहिर्गमनसँगै नुवाकोट कांग्रेसभित्र आन्तरिक असन्तोष थप सतहमा आएको विश्लेषण गरिएको छ। चुनावी माहोल नजिकिँदै गर्दा यस घटनाले स्थानीय राजनीतिक समीकरणमा असर पार्ने सम्भावना देखिएको छ।

यता जिल्ला कांग्रेसले औपचारिक प्रतिक्रिया दिएको छैन। तर अधिकारीको आक्रामक अभिव्यक्तिले संगठनभित्र नेतृत्व, पारदर्शिता र अवसर व्यवस्थापनबारे गम्भीर प्रश्न उठाएको छ। नुवाकोटको राजनीतिमा उनको यो कदम केवल पार्टी परिवर्तन मात्र नभई—नेतृत्वशैलीमाथिको खुला चुनौतीका रूपमा हेरिएको छ।