काठमाडौं,१८ पुस । उपन्यासकार नगेन्द्र न्यौपानेको उपन्यास ‘दरबारको कानुन’ लोकार्पण गरिएको छ । काठमाडौंमा शुक्रबार एक विशेष कार्यक्रमबीच साहित्यकार प्राध्यापक पुरूषोत्तम दाहालको अध्यक्षता र प्राडा शैलेन्दुप्रकाश नेपालको प्रमुख आतिथ्यमा भएको कार्यक्रममा प्रमुख अतिथि, सभाध्यक्ष, विशेष अतिथि खेमनाथ दाहाल, राधेश्याम लेकाली, ईश्वरी वाग्ले, डा. यज्ञश्वर निरौला, डा. अम्बिका अर्याल, सन्तोष श्रेष्ठलगायत मञ्चासीनहरूले कृतिको लोकार्पण गर्नुभएको थियो ।

समीक्षक डा. अम्बिका अर्यालले गल्ती गर्नेले छाती फुकाएर हिँडेको र गल्ती नगर्नेले यातना खेपिरहेको तीतो यथार्थ उपन्यासमा समेटिएको बताउनुभयो । त्यस्तै डा. यज्ञेश्वर निरौलाले नमिता–सुमिता काण्डमा आधारित उपन्यासमा मान्छेको क्रूरताको चित्रण गरिएको बताउनुभयो । यस्तो घटना नदोहोरियून् भन्ने सचेत गराउन उपन्यासकारको ध्येय हुन सक्ने पनि उहाँले बताउनुभयो ।

साहित्यिक पत्रकार संघका अध्यक्ष राधेश्याम लेकालीले डायास्पोरिक स्रष्टाहरूले नेपाली साहित्यको समृद्धिका लागि उल्लेख्य भूमिका निर्वाह गरिरहेको बताउँदै लेखकलाई शुभकामना दिनुभएको थियो ।

शुभकामना मन्तव्यका क्रममा विश्व कीर्तिमानी संगीतकार तथा उपन्यासकार सन्तोष श्रेष्ठले लेखककै उपस्थितिमा अन्तरसंवाद कार्यक्रम भएको खण्डमा उपन्यासमा उल्लेखित घटनाहरुका तथ्यमा जानकारी हुने थियो भन्दै कृति सफलताको लागि शुभकामना व्यक्त गर्नुभयो ।

त्यस्तै, महाकाव्यकार खेमनाथ दाहालले कठोर साधनामा लेखिएको उक्त उपन्यासले यस विषयमा उपन्यास वा अन्य कृति वा लेखन सामग्री लेख्न चाहनेहरूलाई सन्दर्भ सामग्रीको काम गर्ने बताउनुभयो । उहाँले घटनाक्रमका उपन्यास दस्तावेजका रुपमा आएको धारणा राख्नुभयो ।

त्यसैगरी प्रमुख अतिथि शैलेन्दुप्रकाश नेपालले नमिता-सुमिता काण्डको विषयमा आफूले धेरै पहिले कविता लेखेको स्मरण गर्दै दुई लाइन कविता सुनाउनुभएको थियो भने अहिले उक्त काण्डलाई प्लट बनाएर उपन्यास नै बजारमा आउनु चानचुने कुरा नभएको बताउनुभयो ।

कार्यक्रमका सभापति साहित्यकार प्राध्यापक पुरूषोत्तम दाहालले आफू पत्रकारिता पेशामा भएका कारण उक्त घटनाका विषयमा आफूले तात्कालीन समयमा धेरै नै समाचारहरू प्रकाशित गरेको कुरा स्मरण गर्नुभयो । प्रा. दाहालले शक्तिको आडमा अहिले पनि त्यस्ता घटना भइरहेको कुरा जानकारी गराउँदै त्यस्ता घटनाहरूका उदाहरणसमेत प्रस्तुत गर्नुभएको थियो ।

अनेसास दर्पणको संयोजनमा मिलापको आयोजनामा भएको कार्यक्रमको सहजिकरण कृष्ण भुसालले गर्नुभएको थियो भने मिलाप कार्यकारी सम्पादक गीता अधिकारीले सहभागीहरूलाई शब्दमार्फत स्वागत गर्नुभएको थियो । कार्यक्रमको संयोजन अनेसास दर्पणका कार्यकारी सम्पादक रमेश दाहालले गर्नुभएको हो ।

स्रष्टा न्यौपानेका ‘हराएका कैदीहरू’ (कवितासंग्रह), ‘यात्राको बङ्गालादेश’ (यात्रासंस्मरण), ‘अन्तिम घुट्को’ (कथासंग्रह), ‘उल्टो रिस’ (उपन्यास), ‘कङ्गो र इथोपियाको सेरोफेरो’ (नियात्रासंग्रह), ‘बर्मा र थाइल्यान्डभित्र नेपाल’ (नियात्रासंग्रह), ‘दरबारबाहिरकी महारानी’ (उपन्यास), ‘खण्डहर दरबार’ (उपन्यास) जस्ता कृति प्रकाशित छन् ।

लोकार्पित उपन्यास ब्रदर बुक्स प्रकाशन प्रा.लि.ले बजारमा ल्याएको हो । बद्री अधिकारीको डिजाइन र आवृत्ति छापाखानाको मुद्रण रहेको छ ।

कार्यक्रममा साहित्यकार लेखनाथ पोखरेल, डा. बुनु दाहाल, चलचित्र विकास बोर्डका सदस्य गणेश सुवेदी, अग्रज पत्रकार सानुकाजी श्रेष्ठ, तुलसी गिरी भावुक, बद्री अधिकारी, प्रकाशक यज्ञ न्यौपाने, भीम श्रेष्ठ, राजेन्द्र दाहाल, नारायण नेपाल, बोधराज पौडेल, मदन अधिकारी, गायक रमेश पाठक, राजेन्द्र दाहाल, रीना श्रेष्ठ, सफल पौडेल, सुरेन्द्र थापा, श्रीराम राई, भोला अधिकारी, रीना श्रेष्ठ, निर्देशक रामशरण कोइरालासहित अन्य विशिष्ट साहित्यकार, पत्रकारहरुको उल्लेख्य उपस्थिति रहेको थियो । तस्बिर : सुरेन्द्र थापा