काठमाडौं । नेपालले चालु आर्थिक वर्ष २०८१/८२ को पहिलो सात महिनामा निर्यातमा उल्लेखनीय वृद्धि हासिल गरेको छ।

भन्सार विभागले सार्वजनिक गरेको तथ्याङ्कअनुसार साउनदेखि माघसम्मको अवधिमा निर्यात ४६.५० प्रतिशतले वृद्धि भई एक खर्ब २७ अर्ब २० करोड ४८ लाख रुपियाँ पुगेको छ।

गत वर्ष सोही अवधिमा कुल निर्यात ८६ अर्ब ८३ करोड नौ लाख रुपियाँ मात्र रहेको थियो। निर्यात वृद्धिको प्रमुख कारकको रूपमा खाने तेलको उच्च व्यापार देखिएको छ। तथ्याङ्कअनुसार, सात महिनामा ३७ अर्ब रुपियाँ बराबरको भटमास तथा सनफ्लावर तेल निर्यात भएको छ, जसले कुल निर्यातको ३२ प्रतिशत हिस्सा ओगटेको छ।

विशेषगरी भारतले प्रशोधित तेलको आयातमा ३२.५० प्रतिशत भन्सार शुल्क लगाएका कारण नेपालबाट ठूलो परिमाणमा तेल निर्यात भइरहेको छ। अन्य देशहरूबाट आयात गर्दा महँगो पर्ने भएकाले नेपालबाट भन्सार छुटमा निर्यात गर्दा व्यापार प्रवाह तीव्र बनेको हो।

यस वृद्धिले नेपालको निर्यात व्यापारलाई नयाँ उचाइमा पुर्‍याएको छ भने आगामी दिनमा यो वृद्धिलाई अझ मजबुत बनाउन उत्पादन क्षमतामा थप लगानी आवश्यक देखिन्छ।