धादिङ,२९ फागुन । मिलाप फाउण्डेशनले विद्यार्थीलाई शैक्षिक सामग्री वितरण गरेको छ । ‘गरे के असम्भव एक सामाजिक अभियान’ भन्ने मूल नारासहित समाजसेवामा सक्रिय फाउण्डेशनले बुधबार धादिङ धुनिबेशी-३ स्थित श्रीत्रिकुटेश्वरी माध्यमिक विद्यालयका विद्यार्थीलाई विभिन्न शैक्षिक सामग्री वितरण गरेको हो ।

सहकार्य र सहानुभूतिको सुन्दर संगम बनेको उक्त कार्यक्रममा राष्ट्रखबर डट कम र नेशनल इभेन्ट म्यानेजमेन्ट एसोसिएसनले सहकार्य गरेका थिए । कार्यक्रमको वातावरण सेवाभाव, सहयोग र प्रेरणाले भरिएको थियो ।

सो अवसरमा विद्यालयका १२५ जना विद्यार्थीलाई विद्यालय झोला (ब्याग), कापी, पेन्सिल, खेलकुद सामग्री, माक्सलगायत अत्यावश्यक शैक्षिक सामग्री हस्तान्तरण गरिएको थियो । ती सामग्री केवल भौतिक सहयोगमात्र थिएनन्, ती भविष्यप्रतिको विश्वास, अध्ययनप्रतिको प्रेरणा र उज्यालो भोलिको आशा बोकेर आएका सन्देश थिए ।

शैक्षिक सामग्री वितरण कार्यक्रममा राष्ट्र प्रेसका सुमित रजत, गायक डिजेयुवा, विद्यालयका प्रिन्सिपल रमेश कँडेल, शिक्षकहरू दिलीप रेग्मी, शरदराज रेग्मी, उमेश न्यौपाने, सुबास ढउन्यालगायत व्यक्तित्वहरूको उपस्थिति थियो ।

कार्यक्रममा बोल्दै विद्यालयका प्रिन्सिपल रमेश कँडेलले विद्यालयमै आएर विद्यार्थीलाई आवश्यक शैक्षिक सामग्री प्रदान गरेकोमा आयोजकप्रति आभार व्यक्त गर्नुभयो । उहाँले यस्तो सहयोगले विद्यार्थीहरूमा पढाइप्रतिको उत्साह बढ्ने बताउँदै आगामी दिनमा यस्ता कार्यक्रमलाई निरन्तरता दिन आग्रह गर्नुभयो ।

अन्य वक्ताहरूले समाजमा सकारात्मक परिवर्तन ल्याउने यस्ता सामाजिक अभियानहरूको खुलेर प्रशंसा गरेका थिए । उनीहरूले मिलाप फाउण्डेशनले देखाएको सामाजिक जिम्मेवारी र सेवाभाव अनुकरणीय रहेको धारणा राखेका थिए ।

फाउण्डेशनकी अध्यक्ष गीता अधिकारीले विशुद्ध सामाजिक सेवाको भावना लिएर मिलाप फाउण्डेशनले समाजका विभिन्न क्षेत्रमा योगदान दिँदै आएको बताउनुभयो । उहाँका अनुसार विगतमा पनि फाउण्डेशनले स्वास्थ्य शिविर सञ्चालन, शैक्षिक सामग्री वितरण तथा अन्य विभिन्न सामाजिक सहयोगका कार्यक्रमहरू गर्दै आएको छ ।

उहाँले यस कार्यक्रमलाई सफल बनाउन साथ र सहयोग पुर्‍याउने सबै संस्था तथा व्यक्तिहरूप्रति धन्यवाद व्यक्त गर्नुभयो । साथै आगामी दिनहरूमा पनि समाजका विभिन्न क्षेत्रमा सेवा विस्तार गर्दै अझ प्रभावकारी सामाजिक अभियान सञ्चालन गर्ने प्रतिबद्धता व्यक्त गर्नुभयो ।

अध्यक्ष अधिकारीले २०७२ सालको विनाशकारी भूकम्पका बेला पीडितहरूलाई तत्काल राहत उपलब्ध गराउने कार्यमा समेत फाउण्डेशन सक्रिय रूपमा लागेको स्मरण गर्दै सामाजिक सेवा नै फाउण्डेशनको प्रमुख ध्येय रहेको बताउनुभयो ।

त्यसैगरी फाउण्डेशनका उपाध्यक्ष राज लुईंटेलले समाजप्रतिको उत्तरदायित्वलाई केन्द्रमा राख्दै सामाजिक सेवाका कार्यक्रमहरूलाई निरन्तरता दिइने बताउनुभयो । यस कार्यका लागि मिलाप फाउण्डेशनका सदस्य धादिङ स्थायी घर हुनुभएका सञ्चारकर्मी सुरेन्द्र थापाले सहजीकरण गर्नुभएको थियो ।