काठमाडौं,२० चैत । सभामुखमा रास्वपा उपसभापति अर्याल निर्विरोध भएका छन् । सभामुख पदका लागि मनोनयन दर्ताका लागि तय गरिएको आज बिहान ११ बजेदेखि दिउँसो २ बजेसम्मको समयमा अर्यालको एकल उम्मेदवारी परेसंगै उनी निर्बिरोध भएका हुन्। यसको औपचारिक घोषणा हुन भने बाँकी छ ।

प्रतिनिधिसभा नियमावलीको नियम ७ मा सभामुखको निर्वाचनसम्बन्धी व्यवस्था छ । जसअनुसार सभामुखमा एक जनाको मात्रै मनोनयन दर्ता भए प्रतिनिधिसभामा समर्थक सदस्यले बोलिसकेपछि अध्यक्षता गर्ने व्यक्तिले प्रस्तावित सदस्य सभामुख पदमा निर्विरोध निर्वाचित भएको घोषणा गर्नेछन् ।

अब आइतबार बस्ने प्रतिनिधि सभा बैठकले अर्याललाई सभामुखमा निर्वाचित गराउनेछ । प्रतिनिधिसभामा रास्वपा दुई तिहाइ नतिजक छ । सत्तापक्षको स्पष्ट बहुमत भएकाले प्रतिपक्षी दलहरूले सभामुख पदमा उम्मेदवारी दिएनन् ।

२७५ सदस्यीय प्रतिनिधिसभामा रास्वपाको मात्रै १८२ सांसद छन् । नेपाली कांग्रेस ३८, नेकपा एमाले २५, नेपाली कम्युनिस्ट पार्टी १७, श्रम संस्कृति पार्टी ७, राष्ट्रिय प्रजातन्त्र पार्टी (राप्रपा) का ५ सांसद् छन् ।