खगिन्द्रराज बास्तोला

सोलुखुम्बु, २१ कार्तिक। बिश्वभरकै पर्यटकहरूको आकर्षणको केन्द्र मानिने पर्यटकीय गन्तव्य सगरमाथा क्षेत्रलाई सिधा जोड्ने माप्य–खुम्बु मितेरी मोटरेबल पुल आगामी मंसिर ६ गतेबाट औपचारिक सन्चालनमा आउने भएको छ।

ठेकेदार कम्पनी जलप नेपालले ओर्लाङघाटस्थित सो पुलको निर्माण कार्य गत बैशाखमै सम्पन्न गरेपनि यसको औपचारिक उद्घाटन आगामी मंसिर ६ गते गर्न लागिएको माप्यदुधकोशी गाउँपालिकाका अध्यक्ष बुद्धिकिरण राइले जानकारी दिए।अध्यक्ष राइका अनुसार प्रदेश नं १ का मुख्यमन्त्री शेरधन राइले सो पुलको उद्घाटन गर्ने कार्यक्रम तय भएको छ।

माप्य र खुम्बु पासाङल्हामु गाउंपालिकाका स्थानीयको लाइफ लाइन मानिएको सो मोटरेबल पुल निर्माणका लागि संघीय सांसद कोषमार्फत १ करोड , प्रदेश सरकारबाट २ करोड र माप्य दुधकोशी गाउँपालिका तथा खुम्बु पासाङल्हामु गाउँपालिकाले ५०/५० प्रतिशत खर्च ब्यहोरेका थिए।

अध्यक्ष राइका अनुसार रु. ९ करोड ४५ लाखको डीपीआर बनेपछि टेण्डर आह्वान गरिएकोमा जलप नेपाल कम्पनीले त्यसको १३ प्रतिशत विलो (न्यून) रकममा काम गरेको हो । कम्पनीले जम्मा रु. ७ करोड २९ लाख ९७ हजार २ सयमा काम सम्पन्न गरेको उनले बताए।

पुल उद्घाटन कार्यक्रममा प्रदेश नं १ का अर्थमन्त्री इन्द्र आङ्बो, संघीय सांसद हेमकुमार राई ‘सुरबीर’, प्रदेश सांसदहरु उत्तमकुमार बस्नेत र बुद्धिकुमार राजभण्डारी, जिसस सोलुका प्रमुख बीरकुमार राई लगायतको उपस्तिथि रहने बताइएको छ।